Disusun jari nan sapuluah, ditakuakkan kapalo nan satu, dihunjamkan lutuik nan duo. Kapado Allah ampun dimintak, sambah dianta dipuhunkan, kapado Pengghulu Pemangku Adat, bila maulana jo tuangku, nan manjunjuang soko dalam adat, sarato imam dengan khatib, nan mudo pambimbiang dunia, bundo kanduang samo di dalam.
Ujiek kato buah rundingan, sakiro paham dikandaki bahubuang jo maso nan ditampuah, musim nan tumbuah iko kini, syariat ado bahakikat, lahie kulie mangandung isi. Di lua nan tampak nyato, di dalam kandungan ulemu, tiliek nyato paham mamanjek, di jauhari simpanan kato. Kalau dipilieh jo ikhtiar, jikok aka dijalankan, jo tanang budi marangkak, kateh nyato taambun jantan, ka bawah jaleh takasiek bulan.
Sampai tabagi dek ulemi, lahie manjadi buah ama, dek enggeran soko nan tatagak. Malangkah di ujuang padang, basilek di pangka karieh, kato salalu baumpamo, rundiang nan banyak bakiasan. Dalam kulie pandanglah isi, di nan lahie batin tabayang. Kulie maieh ditimpo batin, batin ditimpo galo-galo, dalam lahie manganduang batin, dalam batin bahakikat pulo.
Rumah gadang bari bapintu, nak tarang jalan ka halaman, jikok dikumpua saleba kuku, kalau dikambang saleba alam. Talago adat nan tidak kariang, sapayah-payah manimbo, walau dalam musim kamarau, mailieh taruieh aie nan janiah. Latiek-latiek tabang kapinang, jatuah ka pangka silaronyo, aie satitiak dalam pinang, sinan bamain ikan rayo.
Didorong dek kandak bana, dielo dek cinto hati, mangingek papatah dalam "adat," Bakarieh sikati muno, patah lai basimpai alun, ratak sabuah jadi tuah." Jikok dibukak pusako lamo, dibangkiek tareh nan tarandam, lah banyak ragi nan barubah. Seni budaya tanah aie, lapuak di zaman panjajahan, kini lah jadi buah pikie, sadang di dalam panggalian. Lapuak-lapuak dikajangi, usang-usang dibarui. Mamandang gujalo zaman, edaran maso putaran zaman, lah lanyap zaman panjajahan, lah patuiek disalam nan tabanam.
Ambo nan bukan cadiak pandai, ulemu di Tuhan tasimpannyo, kok senteng tolonglah bilai, tandonyo kita saundiko. Ampun sagalo niniak-mamak, nan gadang basa batuah, kok tasalah maaf pabanyak, nan Qadim hanyo sifat Allah.
- Sumber -
1000 Pepatah-Petitih-Mamang-Bidal-Pantun-Gurindam
0 komentar:
Posting Komentar